Krein fjölskyldan

 
Texti

1. Þetta er helst í fréttum í dag:

Afskipti ráðherra?
Ný rannsókn
Stíf fundahöld
Þúsundir mótmæla
Barátta fram undan
Beittu Svía þrýstingi
Heitar myndir

Mér finnst að fyrirsagnir helstu sjöfrétta Sjónvarpsins mættu vera pínulítið gegnsærri. Á ruv.is, þar sem hægt er að horfa á fréttirnar endursýndar og/eða í beinni útsendingu, eru fyrirsagnir sömu frétta til fyrirmyndar:

Baugsmál: Dómsmálaráðherra vanhæfur?
Yfirlýsing Jóns Ásgeirs um ríkislögreglustjóra
Mikil fundahöld í dag vegna kjaramála

2. Ég hef stundum velt því fyrir mér af hverju þýddur texti í þáttum og kvikmyndum á sjónvarpsdagskránni er öðruvísi útlítandi í auglýsingum en þegar þau (hmm... þ.e. þeir og þær) eru á dagskrá. (Mér finnst þetta reyndar ágætis fyrirkomulag og er ekki að kvarta (sem ég geri dálítið mikið af. (Æi, ég nota allt of mikið af þessum (helvítis) svigum.)).)

3. Ég hélt því einu sinni fram að allar bíómyndir sem hefðu leturgerð á „kápunni“ eins og í Double Take, Mission: Impossible II, Oxygen og Rollerball ættu það líka sameiginlegt að vera lélegar. Ég hef ekki séð neina þessara mynda og er ekki jafnviss um þetta og áður en held að það sé eitthvað til í þessu. En mér varð skiljanlega ekki um sel þegar amma og afi, og síðar foreldrar mínir, keyptu bíl með þessu forljóta letri í mælaborðinu.

Efnisorð: Texti

posted by Freysier at 21.6.06