Krein fjölskyldan

 
Þá er komið að því. Tískuorð ársins 2007 eru ...

... heildstæður og aðkoma.

Til dæmis:
Vilja skoða heildstætt fyrirætlanir OR.
Heildstætt og hagnýtt háskólanám.

Verklagsreglur um aðkomu opinberra aðila þegar hvali rekur á land.
Forsendur fyrir aðkomu lífeyrissjóða brostnar.

Mér finnst þessi orð alveg óborganleg. Það líður ekki sá dagur sem ég heyri þau ekki. Rosalega hljóta menn að hafa verið óvarkárir áður fyrr, þ.e. þegar þeir létu sér nægja að rannsaka hitt og þetta án þess að það hafi verið gert heildstætt.
posted by Freysier at 15.12.07

 
Hver er eiginlega Steingrímur Ragnar Gestsson?
Súkkulaði í verðlaun fyrir rétt svar.
posted by Freysier at 29.11.07

 

Ég sem missti af Airwaves ...
Gunnar Einar Annelsson tekur sig alveg sérstaklega vel út á myndinni, elgtanaður og helmassaður. Myndin er úr nýjasta hefti Séð og heyrt. Ekki nóg með að vinur manns sé í blaðinu heldur „kemst“ svo loksins einhver úr fjölskyldunni í blaðið. Jebb, þetta er víst bróðir minn sem nuddar þarna vinstri rasskinnina á Halla Valla.

Efnisorð: Gannels

posted by Freysier at 29.10.07

 
Svona var ráðstefnan í London





















Á fjórum dögum hlustuðum við á um 30 fyrirlestra í málfræði, flesta í setningafræði (sbr. myndina hér að ofan).
posted by Freysier at 3.9.07

 
Ég er nýkominn af Hróarskelduhátíðinni í Danmörku og í næsta mánuði er það svo annað festival, LAGB-hátíðin. Þar verður aldeilis sukkað! Aðstandendur hátíðarinnar hafa sett „lænöppið“ og dagskrána á netið (http://www.kcl.ac.uk/content/1/c6/02/78/38/kclprognew.pdf) og þar kemur einnig fram hverjir munu „headlæna“. Fram koma margir þekktir málvísindamenn sem einkum stunda rannsóknir við breska háskóla en tveir fyrirlesarar koma frá Háskóla Íslands.

Þetta var djók með að það yrði sukkað. Um er að ræða málvísindaráðstefnu (eða málfræði-) sem verður haldin í London 29. ágúst–1. september nk. en LAGB stendur fyrir Linguistics Association of Great Britain.

Þegar ég var á Hróarskeldu fyrr í mánuðinum hugsaði ég stundum um hvað múgæsingur á popptónleikum getur verið fáránlegur. Dæmi: Bob Dylan stígur fram á sviðið og segir: Hi, I'm Bob Dylan. Þá tryllist allt og fólk öskrar og klappar, þó ekki vegna þess að það hafi efast einhverja stund og hugsað: Hm, er þetta kannski ekki örugglega Bob Dylan? Er ég kannski að fara mannavillt?

Svona lagað gerist hins vegar sjaldan á málfræðiráðstefnum. Ef Anders Holmberg (þekktur málvísindamaður) stígur upp í pontu og segist heita Anders Holmberg fær hann engin viðbrögð frá áheyrendum nema kannski í besta falli: Yeah, I know.

En já, við erum nokkur að fara, tveir kennarar og fjórir nemendur. Til að fjármagna ferðina fundum við mjög góða leið og vonandi munu fleiri íslenskunemar geta fetað sömu leið síðar.

Efnisorð: Hróarskelda

posted by Freysier at 16.7.07

 

Fimmta markið sem Svíar skoruðu í landsleiknum gegn Íslendingum í síðustu viku var stórskrítið og verður örugglega lengi í minnum haft. Í aðdraganda marksins sóttu Svíar að marki Íslands en Ívar Ingimarsson náði boltanum inni í vítateig okkar en hélt þá að dómarinn hefði dæmt aukaspyrnu. Hann spyrnti því boltanum frá sér, ætlaði einhverjum öðrum að taka spyrnuna, boltinn barst til eins Svíans sem gaf svo á Marcus Allbäck sem bað um boltann. Allbäck vissi nefnilega af misskilningi Íslendinga og nýtti sér það þegar hann skaut boltanum í mark okkar án þess að við gætum varist. Í viðtali eftir leikinn var svo Ívar skömmustulegur en Allbäck skælbrosandi. (Hér má sjá markið.)

Mér finnst þessi misskilningur Íslendinga eftir allt saman ekki svo svakalega furðulegur en það sem mér finnst eiginlega furðulegast er að ég hef engan heyrt minnast á að Svíar, og þá auðvitað sérstaklega Marcus Allbäck, ættu að skammast sín fyrir markið. Mér finnst óheiðarlegt að nýta sér svona misskilning til þess að skora mark, mér finnst þetta eiginlega eins og að ráðast aftan að manni sem getur ekki varið sig þess vegna. Og nú geri ég ráð fyrir að langflestir séu ósammála mér.

posted by Freysier at 11.6.07

 
VISSIR ÞÚ AÐ ...

... Karl Wernersson (44), sem talinn er 6. ríkasti Íslendingurinn nú um stundir, á kraftmesta Hummer landsins, með 650 hestöfl undir húddinu?!?
posted by Freysier at 25.5.07

 
Gítarsólóið

Íslenska þjóðin er í öngum sínum eftir útreiðina sem Valentine Lost fékk í Eurovision á fimmtudaginn. Það eru margar hugmyndir uppi um það hvers vegna í ósköpunum íslenska lagið komst ekki áfram; sumir tala um að austur-evrópsk mafía, sem veit ekki aura sinna tal, vinni markvisst gegn okkur og öðrum þjóðum í Vestur-Evrópu, aðrir um að textinn hafi ekki verið góður. Ég held að allir séu sammála um að textinn var mjög slappur en það er spurning hve þungt það vegur. Enginn lætur það hvarfla að sér að lagið hafi ekki verið nógu gott.

Ég hef hins vegar aðra skýringu á lélegu gengi okkar: Gítarsólóið var allt of stutt. Í keppninni hér heima var gítarsólóið í Ég les í lófa þínum um 20 sekúndur en það er ekki nema 10 sekúndur í ensku útgáfunni.
Hlustið bara sjálf:

Íslenskt gítarsóló
Útlenskt gítarsóló
posted by Freysier at 12.5.07

 
Texti II

Ekki treysta bókum með línubili 1,5.

Efnisorð: Texti

posted by Freysier at 27.4.07

 
Getraun: Hvert er lagið?
posted by Freysier at 11.3.07

 
Það er nú ekki oft sem mér tekst að sameina tvö af áhugamálum mínum, Eurovision og málfræði, en ég ætla a.m.k. að gera tilraun til þess.

Árið 1967 sigraði Sandie Shaw í Eurovision er hún flutti framlag Breta, Puppet on a String. Stuttu síðar hafði textinn verið íslenskaður og lagið kom þá út í flutningi Hljómsveitar Ingimars Eydal en nú kallaðist lagið Þú kysstir mig.

Ég heyri ekki betur en Helena Eyjólfsdóttir syngi: Ég dansa í öðrum heimi / og dreymi um þig.

Ef það er rétt er þetta dæmi um svokallaða nefnifallshneigð (eða nefnifallssýki) því að „rétt“ er að segja mig dreymir og þ.a.l. byggist maður við ég dansa og dreymir um þig.

Að vísu er möguleiki á því að mér misheyrist, sérstaklega ef litið er á allt rímið í viðlaginu:

Ég dansa í öðrum heimi
Og dreymi(r) um þig
Alveg dásamlegt algleymi
Það streymir um mig
Eftir að þú kysstir mig

Hér væri sem sagt eðlilegast að gera ráð fyrir því að við streymir rímaði dreymir (en ekki dreymi) en ég heyri ekki betur en að hér sé dæmi um áðurnefnda nefnifallshneigð :) (Hlustið hér á lagið.)
posted by Freysier at 17.2.07

 
Ég er að fara á grímuball í kvöld. Úff, ég á nú ekkert sérlega góðar minningar frá öskudeginum og öðrum tilefnum sem ég hef notað til þess að klæðast grímubúningi. Ætli ég hafi ekki verið fjórum sinnum í röð indjáni! Og það var sko ekki af því að ég hafi verið svona rosalega hrifinn af menningu indjána. Fyrsta skiptið hefur örugglega verið skemmtilegt, en veit ekki alveg með hin þrjú...

Ég er búinn að vera að velta því fyrir mér hvernig ég geti mætt á ballið í kvöld. Það fyrsta sem ég afskrifaði var auðvitað gamli indjánabúningurinn. Svo hafði mér dottið í hug að vera Zorro eins og ég var fyrir mörgum árum en ég afskrifaði það líka vegna þess að í millitíðinni var gefin út vinsæl en, að mér skilst, slöpp kvikmynd.

Á morgun er úrslitakvöld Söngvakeppni Sjónvarpsins og þá er auðvitað alveg tilvalið að vera einhver Eurovision-stjarna. Ég var að pæla í því að vera Sandra Kim (sem sigraði fyrir Belgíu árið 1986) en hætti svo við þar sem það er kannski ekki svo sniðugt að reyna að líkjast 13 ára stelpu (já, Gleðibankinn tapaði fyrir stelpu).

Næst lá náttúrlega beint við að vera Eiríkur Hauksson þar sem ég er farinn að (þykjast?) hafa gríðarlegan áhuga á manninum. En ég á engar leðurbuxur :(

Rauða hárið á Eika væri ekkert vandamál. Einu sinni fór ég á grímuball Barnastúkunnar og komst hjá því að borga 100 krónur og borgaði í staðinn aðeins 50 krónur (já, hann Hilmar var sniðugur) en þá ætlaði ég að vera aðalkötturinn í Thundercats. Sá var rauðhærður svo mamma makaði bara rauðum matarlit í hárið á mér sem ég var marga daga að losna við. En enginn virtist átta sig á því hver ég var (eða ætlaði að vera). Þvílík vonbrigði! Ekki nóg með það heldur hellti einhver (ekki bara einhver, ég veit hver þetta var) Sprite á mig. Æi, grímubúningar hafa verið eintóm vonbrigði hingað til.

En nú er ég búinn að hætta við Eurovison-búning og ákveða að vera eitthvað allt annað. Segi samt ekki hvað, ekki strax.
posted by Freysier at 16.2.07

 
Ég heyrði Sjúbbídú, eitt allra lélegasta framlag Íslendinga til Eurovision, um helgina. Þá rifjaðist upp fyrir mér ótrúlega fyndið bragð til að komast fram hjá gömlu reglunum um að hver þjóð flytti lag á móðurmálinu. Þetta bragð er m.a.s. orðað í viðlaginu: Sjúbbídú menn skilja jafnt á Skagaströnd og Timbúktú.

Í textanum koma fyrir fjölmörg nöfn sem þekkt eru á alþjóðavísu (þetta er bara upphaf lagsins): Louis hann söng margt, sjúbbídú ahh, Sarah og Ella með. Frankie hann söng New York, New York ... Söng ekki Nat Cole með? Manstu eftir Elvis syngja Love me Tender?

Sverrir Stormsker beitti sama bragði í keppninni 1988 í laginu Þú og þeir, þ.e. að syngja á alþjóðsku: Ég dái Debussy, ég dýrka Tchaikovsky og Einar Ben [ég veit ekki alveg hversu þekktur hann er í útlöndum en það er auðvitað aldrei að vita, sakar ekki að reyna] og Beethoven ... Ég tilbið Harold Lloyd, ég tilbið Sigmund Freud og John Wayne og Mark Twain og þig og Michael Caine. Syngjum öll um Sókrates, sálarinnar Herkúles ...

Sverrir virðist samt ekki hafa grætt neitt sérstaklega á þessu bragði, við lentum náttúrlega í 16. sæti með aðeins 20 stig. Hins vegar virkaði það óaðfinnanlega árið 1996 en líklega má skrifa öll stigin sem við fengum í keppninni það ár (við fengum 51 stig!) og sætið þrettánda á Elvis og félaga. Hvernig í ósköpunum ætti annars að skýra þetta góða gengi?
posted by Freysier at 13.2.07

 
Idolið virðist stökkpallur fyrir undankeppni Eurovision (sumir myndu kannski tala um gryfju — þetta er spurning um hvort fólk lítur á þetta sem skref upp á við eða niður). En allavega, í gær voru t.d. þrjár idol-stjörnur og þ.á m. Heiða. Hún hefur ágætis reynslu af söng(va)keppnum því að henn gekk jú mjög vel í idolinu og svo söng hún sigurlagið í Dægurlagakeppni Kvenfélags Sauðárkróks árið 2004 (áður en hún byrjaði í idolinu). Höfundur lagsins, Með sumar í hjarta, er Bryndís Sunna Valdimarsdóttir en hún tók átti einmitt lag í keppninni í gær. Hvorug komst þó áfram.

Hlusta á Með sumar í hjarta hér.
posted by Freysier at 21.1.07

 
Fyrsti í Eurovision
Fyrsta undanúrslitakvöld íslensku Eurovision-undankeppninnar er í kvöld. Þar sem ég er mikill áhugamaður um keppnina verður þetta blogg helgað keppninni næstu vikur.
posted by Freysier at 20.1.07

 
Kertasníkir

Gleðilegt ár! Nú eru jólin að klárast og síðasti jólasveinninn fer heim í kvöld og þá rotum við jólin.

Ég var að pæla í því að velja lag ársins en á í pínu vandræðum með það. Öll lögin sem mér dettur í hug tengi ég við síðasta sumar einhverra hluta vegna. Fyrst verður mér hugsað til Hvers vegna varst'ekki kyrr? með Pálma Gunnarssyni en það heyrðist oft á meðan HM í fótbolta stóð yfir í magnaðri auglýsingu. En það er dálítið skrítið að velja svona gamalt lag sem lag ársins 2006 (og svo var ég búinn að blogga um þetta).

Svo kemur Crazy með Gnarls Barkley til greina en ég er bara kominn með svo mikið ógeð á þessu lagi að mig langar ekki að velja það.

Ætli ég velji þá ekki barasta Ég kyssi þig á augun með Hugleiki Dagssyni og Benna Hemm Hemm :)
posted by Freysier at 6.1.07