Krein fjölskyldan

 
Að tjá sig með táknmáli

Jæja, núna ættu allir að vera sprenglærðir í spænsku síðan ég blöggaði seinast. Þá er það næsta mál; táknmál!

Í dag var 2. bekkingum í Rimaskóla gefin verkefnabókin „Upp með hendur“. Var það Vigdís Finnbogadóttir, velvildarsendiherra tungumála, sem afhenti börnunum þessa verkefnabók í táknmáli. Í kjölfarið munu öll 7 ára börn fá bókina að gjöf en það er Félag heyrnarlausra sem stendur fyrir útgáfunni með stuðningi Símans í samstarfi við Samskiptamiðstöð heyrnarlausra og heyrnarskertra og Námsgagnastofnun.

Áður en lengra er haldið er ekki úr vegi að kíkja á fingrastafrófið.

Á heimasíðu Námsgagnastofnunar er að finna athyglisverða kennslu í táknmáli. Er hér um að ræða kennsluleiðbeiningar með fyrrgreindri verkefnabók. Fer kennslan fram á myndbandi sem hægt er að ná í á síðunni. Eru þar bókstafirnir kenndir auk þess sem tákn fyrir mat, tölur, dýr o.fl. er að finna.

Átak þetta er þó vitanlega ekki nægilegt í málefnum og réttindabaráttu heyrnarlausra. Á heimasíðu sinni hefur félagið Heyrnarhjálp birt áskorun beint til yfirmanna RÚV (lesa áskorun) þess efnis að íslenskt sjónvarpsefni verði textað. Ennfremur má t.d. benda á það að íslenskt táknmál hefur enn ekki verið viðurkennt sem móðurmál heyrnarlausra Íslendinga. Hljóta þessi málefni að teljast til sjálfsagðra mannréttinda heyrnarlausra, þó sér í lagi hið síðarnefnda þar sem heyrnarlausir geta ekki tjáð sig munnlega á opinberu móðurmáli allra Íslendinga.

Tilheyrandi tenglar:
Félag heyrnarlausra
Heyrnarhjálp
Heyrnar- og talmeinafélag Íslands
Kennsluleiðbeiningar Námsgagnastofnunar
Samskiptamiðstöð heyrnarlausra og heyrnarskertra
posted by Freysier at 26.3.03

 
Einar Trausti að gera það gott!

Var um daginn að skoða bloggið hennar Steru og sá þar link inn á þessa síðu. Þetta er síða sem Einar Trausti Óskarsson, kennari við FS, er búinn að setja upp. Þetta er kennsla í spænsku þar sem hann notar mjög sniðugar aðferðir. Maðurinn er ótrúlega afkastamikill, því hefur maður kynnst í skólanum.

Þetta er í rauninni mjög sniðug síða fyrir hvern þann sem hefur áhuga á að læra spænsku eða vill einfaldlega halda sér við. Þó ímynda ég mér að þetta gagnist þeim lítið sem meira kann. En munið að hafa hljóðið á, það eykur skemmtanagildið. Húmor Einars Trausta er ruglaður og mér að skapi.
posted by Freysier at 13.3.03

 
Sjemm

Nú þegar styttist í CM 4 (Championship Manager) er ég að leika mér í einni af fyrstu útgáfum leiksins, þ.e. CM 93/94. Ég er náttúrlega löngu hættur að spila eitthvað nýrra en þessa útgáfu, hætti um svipað leyti og þegar CM 3 kom út. Þetta eru allt of flóknir leikir fyrir óþolinmóða eins og mig.

Ég var að ræða þennan leik um daginn og þá kom í ljós að mesti anti-sportisti okkar tíma hefur gaman að CM 93/94 en það er auðvitað enginn annar en Ellert. Mér finnst persónulega fáránlegt að honum finnist þetta skemmtilegur leikur þar sem hann þekkir afar fá knattspyrnumenn, ef einhverja.

Hér að neðan er hægt að ná í umtalaðan leik. Úrslitin fylgja með í þessum download-file en eins og margir kannast við þarf maður alltaf að skrifa niður einhver úrslit áður en hægt er að hefja leikinn. Nú þarf sem sagt ekki lengur að giska. Og svo þar sem ég veit fátt skemmtilegra en að nota svindl fylgir hér eitt gott ráð: Veljið Tranmere í upphafi, veljið persónuleikann „selfish“ og nefnið ykkur mr. (first name) Bulgaria (surname), þ.e. mr. Bulgaria. Þá á Tranmere mjög mikinn pening en á erfitt með að kaupa stóru nöfnin þar sem fáir hafa áhuga á að spila með Tranmere undir stjórn eigingjarns knattspyrnustjóra.

Downloada CM 93/94
posted by Freysier at 12.3.03

 
Vonbrigði kreditkorta

Jæja, Birgitta og Hallgrímur fara að öllum líkindum til Lettlands með lagið Segðu mér allt þrátt fyrir að vera ansi líkt öðru lagi og þrátt fyrir að menn hjá STEF séu búnir að ráðleggja Hallgrími að fara ekki með lagið í úrslitakeppnina. Greyið strákarnir í Botnleðju sem eru tilbúnir að selja sig ódýrt þessa dagana.

En ég fann nokkur Eurovision-lög á netinu, misgömul og misgóð (eins og gefur að skilja), sem hægt er að downloada hér að neðan:

Birgitta Haukdal - Segðu mér allt
Bobbysocks - Let it Swing
Botnleðja - Eurovísa
Brainstorm - My Star
Charlotte Nilsson - Take Me to Your Heaven
Sandra Kim - J'aime la vie
Selma Björnsdóttir - All out of Luck
posted by Freysier at 7.3.03

 
Segðu mér allt ekki til Riga?

Það gæti farið svo að lagið Segðu mér allt eftir Hallgrím Óskarsson í flutningi Birgittu Haukdal, sem vann í undankeppni Eurovision á Íslandi, fari ekki til keppni Riga í Lettlandi eftir allt saman. Lagið þykir of líkt lagi Richard Marx, Right Here Waiting. Um þetta eru menn innan STEF sammála.

Í Fréttablaðinu í dag segir að það liggi því beinast við að lag Botnleðju, Eurovísa (sem ég er farinn að halda að sé ekki viljandi orðaleikur), verði sent út sem framlag Íslendinga þar sem það lenti í öðru sæti.

Það yrðu að sjálfsögðu gríðarleg vonbrigði fyrir Hallgrím og Birgittu ef lagið yrði stoppað af svo það er vonandi að það verði leyst úr þessu þannig að þau fái að fara.

Annars hefur ekki alltaf verið fyrir miklum frumleika að fara í Eurovision. Sem dæmi má taka að nánast allir Íslendingar voru sammála um að lagið sem vann árið 1999 hafa verið stolið. Þá lentum við í 2. sæti með laginu All Out of Luck. Sænska lagið sem vann var greinilega mjög líkt tónlist ABBA.

Fyrir þá sem hafa áhuga á að heyra umrætt lag, Right Here Waiting, geta smellt á linkinn hér að neðan til að nálgast lagið á mp3-formi. Því miður er hér ekki til samanburðar lagið Segðu mér allt en flestallir ættu að hafa heyrt það lag svo nú er bara að bera lögin saman. Góðar stundir.

Richard Marx - Right Here Waiting
posted by Freysier at 5.3.03